Bautatölt 2012 fór fram í gærkvöldi. Góð þátttaka var að venju þetta kvöld og fór Ísólfur með Návist frá Lækjamóti og Kvaran frá Lækjamóti á ísinn.  Óhætt er að segja að þau hafi notið sín vel á ísnum en þau komust bæði í úrslit. Návist í B-úrslit með einkunnina 6,47 og 7.sæti eftir forkeppni og Kvaran í A-úrslit með einkunnina 7,0 og efsta sæti eftir forkeppni. Ísólfur varð því fyrir því lúxusvandamáli að þurfa að velja á milli þessara tveggja gæðinga en Návist er ung 1.verðlauna hryssa í eigu Þóris og Kvaran er vaxandi alhliðagæðingur sem verður meðal annars þátttakandi í 5-gangi KS deildar, meistaradeildar Norðurlands, í vetur. Hvorugt þeirra hefur þó farið á ísmót áður og var því gaman að sjá hve þau nutu sín vel á svellinu. Ísólfur tók þá ákvörðun að fara með Kvaran í A-úrslitin sem voru jöfn og spennandi. Lokaniðurstaðan varð sú að þeir urðu í þriðja sæti með einkunnina 7,33, glæsilegur árangur það.