Sá sorglegi atburður átti sér stað í gær þann 19.desember að gæðingurinn Sindri frá Leysingjastöðum II lést. Sindri veiktist skyndilega föstudagsmorguninn 17.desember. Í fyrstu var talið að um hrossasótt eða fóðureitrun væri að ræða og fékk hann meðhöndlun við því. Á laugardeginum virtist Sindra líða betur og voru dýralæknar sammála um það. Á sunnudagsmorgni versnaði honum skyndilega aftur og lést. Krufning leiddi í ljós bólgur í þörmum sem leiddu til blóðeitrunar. Ekki er vitað um orsök veikindanna enda mjög sjaldgæf hér á landi og engin lækning þekkt.
Sindri var heygður í Miðdegishólnum á Lækjamóti en þar sem fallnir höfðingjar hvíla.
Mikil sorg ríkir við þennan missi enda um einstakan vin og gæðing að ræða en þökkum um leið fyrir ánægjulegar og ógleymanlegar stundir, þú kenndir okkur margt.



Ísólfur og Sindri þreyttir en glaðir eftir velheppnaða kennslusýningu í Gusti sl. vetur.



vinirnir Sindri og Guðmar spjalla saman


Sindri og Ísólfur í úrslitum á Íslandsmóti 2009

Sá skemmtilegi dagur rann upp í lok síðustu viku að norður hluti hesthúsins varð fullgerður eftir marga vikna vinnu Þóris sem hefur einn séð um að smíða allar stíurnar. Hestarnir voru glaðir að komast í "svíturnar" sínar en alls eru 11 einshesta stíur (hver 6,70 fm) og 4 tveggja hesta stíur (hver 12,5 fm). Eins og sjá má á myndinni hér fyrir neðan fer vel um hrossin.


beðið eftir heyvagninum, Freyðir farin að ulla af spenningi :)

Eftir áramót mun Anna-Lena Aldenhoff hefja verknám frá Hólaskóla hér á Lækjamóti. Við skelltum okkur því í fjölskylduferð á Hóla til að hitta Önnu Lenu, kennara og aðra verknámskennara í gær. Það er alltaf gaman að koma á Hóla og voru Ísak og Guðmar glaðir að fá að koma með og hitta vini sína þar. Ísak fékk að fara í grunnskólann og ljúka skóladeginum með gömlu bekkjarfélögunum og Guðmar fór á sinn fyrsta verknámsfund og fylgdist grannt með þegar vinnubrögðin voru sýnd í Þráarhöll.

Guðmar einbeittur á svip að fylgjast með sýnikennslu (auðvitað með hest í hendinni líka...)

Verknámið er tvískipt og stendur yfir frá janúar fram í maí. Fyrst er um að ræða frumtamningu og að því loknu taka við þjálfunarhestar. Markmið verknámsins eru m.a að nemandinn fái - skipulega starfsþjálfun í tamningu, þjálfun og umhirðu hesta. - Auki sjálfstæði sitt við tamningu og þjálfun hesta. - Fái innsýn inn í stjórn og rekstur tamningastöðvar/hrossabús og fái þjálfun í mannlegum samskiptum.
Í gær fengum við að sjá hluta af þeim vinnubrögðum sem nemendur læra og voru það Þórarinn Eymundsson, Eyjólfur Þorsteinsson og Mette Mannseth sem stjórnuðu sýnikennslunni.




Anna Lena sýnir "laus í hringgerði"


hluti af nemendum 2.árs bíða spennt eftir að fá að sýni tryppin sín

Þá eru komin inn flest af þeim hrossum sem verða inni fyrir áramót og starfið að komast á fullt. Alls eru nú inni 23 hross þar af 11 stóðhestar. "nýji" hesthúshlutinn er að verða klár, 5 stíur alveg tilbúnar og 10 langt komnar. Alls verður pláss fyrir a.m.k 43 hesta þegar allt er tilbúið. Í dag var frídagur hjá hestunum og fengu þeir að dvelja lengi úti í veðurblíðunni. Myndavélinni var svo tekin með þegar sett var inn og kvöldgjöfin gefin.

Ísak og Guðmar duglegir að hjálpa til í hesthúsinu

hinn gangurinn

Sindri f. Leysingjastöðum í einni af nýju stíunum


   Borgar f. Strandarhjáleigu                      Blysfari f. Fremra-Hálsi

Þar sem það fylgir því óhjákvæmilega miklar járningar þegar mörg hross eru tekin á hús er Guðmar búin að "stúdera" járningar síðust daga. Þessi aðferð hans verður þó líklega seint talin venjuleg en hún virkar




Mjög einbeittur. Svo er auðvitað að athuga fótstöðuna og hvernig til tókst

Í dag var farið í yndislegu veðri, frosti og logni, að tína inn gæðinga og gæðingsefnin sem verða inni í vetur. Það er alltaf gaman að taka hrossin á hús og var ekki laust við fiðring í maganum eins og jólin væru að koma þegar farið var í hólfin að sækja hvern gæðinginn á fætur öðrum. Nú vonar maður bara að hrossin verði öll frísk í vetur og hægt verði að sýna hvað í þeim býr. Þeir hestar sem teknir voru inn í dag voru stóðhestarnir: Kraftur f. Efri-Þverá, Sindri f. Leysingjastöðum II, Freyðir f. Leysingjastöðum II, Blysfari f. Fremra-Hálsi, Gustur f. Lækjarbakka, Flugar f. Barkarstöðum, Vígtýr f. Lækjamóti, Kufl f. Grafarkoti. Einnig voru tekin inn: Hvítserkur f. Gauksmýri, Kristófer f. Hjaltastaðahvammi, Katrín f. Vogsósum, Hörður f. Hnausum og Serbus f. Miðhópi. Á næstu dögum munu bætast fleiri í hópinn og því spennandi dagar framundan.
                                                                                                                                               

Vígtýr f. Lækjamóti og Freyðir f. Leysingjastöðum II sóttir í stóðhestahólf


sumir voru hrifnari af fötunni en aðrir en í henni leyndustu kögglar


það var ekið um sýsluna til að ná í stóðhestana úr ýmsum hólfum


Guðmar var að sjálfsögðu með þennan dag og hjálpaði mikið til. Hér fær hann blíðar móttökur hjá kisu (Rispu f. Þingeyrum) sem býr í hesthúsinu, fegin að fá félagsskap í húsið.


"útlendingurinn" eins og sumir kalla hann í fjölskylduboðum, glaður að vera komin heim eftir mikla kennslu og sýningartörn erlendis.

Síðustu daga hefur Ísólfur tekið þátt í að sýna  íslenska hestinn í bandaríkjunum á hinu risastóru World Equestrian Games sem haldið var að þessu sinni í Kentucky Horse Park. Þetta er í fyrsta sinn sem íslenski hesturinn fær að taka þátt en örugglega ekki í það síðasta. Í sýningunni tóku alls þátt 8 knapar undir stjórn Guðmars Þórs sem býr ásamt Gígju Dögg með íslenska hesta í Kentucky.
Sýningin gekk mjög vel og vakti gífurlega athygli en í atriðinu var blandað saman fræðslu og skemmtun þar sem fjölmargir kostir íslenska hestsins fengu að njóta sín. Atriðið vakti í raun svo mikla athygli að Guðmar Þór var sífellt boðaður í sjónvarpsviðtöl og eitt kvöldið var hópnum boðið í grillveislu hjá hinum virta knapa Pat Parelli.
Hér koma nokkrar myndir frá sýningunni teknar af Astrid Harrisson


Allur hópurinn ríður þétt saman





ýmsar æfingar sýndar


félagarnir Sölvi og Ísólfur skála líkt og víkingum sæmir

 
James og Flugar frá Barkarstöðum f. Hrafn f. Reykjavík m. Fluga frá Valshamri





Vígtýr frá Lækjamóti f. Stígandi frá Leysingjastöðum II m. Valdís f. Blesastöðum 1A

Búið er að sónarskoða þær hryssur sem voru hjá Blysfara frá Fremra-Hálsi í sumar, en hann var í hólfi á Lækjamóti. Blysfari fór í hryssur eftir Miðsumarsýningu á Vindheimamelum í júlí og voru 30 hryssur hjá honum í sumar. Alls voru 27 hryssur fengnar eftir sumarið og því er fyljunarhlutfallið 90% sem verður að teljast mjög gott. Stærstur hluti þeirra hryssna sem eru fengnar við Blysfara eru 1. verðlauna hryssur enda var folatollurinn frír fyrir 1. verðlauna hryssur í sumar.

Má nefna að hjá honum voru þær Gáta frá Ytra-Vallholti (8,40), Ófelía frá Breiðstöðum (8,18), Smella frá Flugumýri (8,08), Rauðhetta frá Lækjamóti (8,01), Hrönn frá Leysingjastöðum (8,00), Rödd frá Lækjamóti (8,06), Rán frá Lækjamóti (8,22), Dalla frá Ási (8,01), Bestla frá Kagaðarhóli (8,03), Alda frá Syðri-Völlum (8,06), Hending frá Sigmundarstöðum (8,11), Sóllilja frá Halldórsstöðum (8,06), Þruma frá Viðborðsseli (8,00), Ösp frá Minni-Reykjum (8,10), Gola frá Leysingjastöðum (8,14), Svala frá Ólafsfirði (8,06) og Eldborg frá Eyri (8,11) auk fjölda annarra góðra hryssna.


Gáta frá Ytra-Vallholti                                                   Ófelía frá Breiðstöðum


Smella frá Flugumýri                                                           Rauðhetta frá Lækjamóti



Hrönn frá Leysingjastöðum                                                       Rödd frá Lækjamóti

Farið var með hryssur í kynbótadóm á Blönduós í vikunni og gekk það nokkuð vel. Hæsta dóm sýningarinnar eða 8,17 í aðaleinkunn hlaut glæsihryssan Framtíð frá Leysingjastöðu II. Framtíð hefur verið í þjálfun hjá Ísólfi síðan í vetur og er fylfull við Kraft frá Efri Þverá. Eigandi hennar er Hreinn Magnússon. Framtíð er 5 vetra gömul undan Orra frá Þúfu og Gæsku frá Leysingjastöðum og hlaut 8,44 fyrir sköpulag og 7,98 fyrir kosti þar af 8,5 fyrir tölt, fegurð í reið, vilja og geðslag og fet.



Framtíð frá Leysingjastöðum II, 5 vetra

 


Þrjár aðrar hryssur voru sýndar og voru þær ansi samstíga í aðaleinkunn eða allar um 7,70 :)
Þetta eru hryssurnar Eyvör frá Lækjamóti, Önn frá Lækjamóti og Eik frá Grund.
Eyvör er 4.vetra gömul undan Kletti frá Hvammi og Rauðhettu frá Lækjamóti. Eigandi er Þórir. Eyvör hlaut í aðaleinkunn 7.70.


Eyvör frá Lækjamóti 4.vetra gömul




Önn frá Lækjamóti er 5 vetra gömul undan Veigari frá Lækjamóti og Öld frá Lækjamóti. Eigandi er Jens T.Mortensen. Önn hlaut 7.71 í aðaleinkunn.


Önn frá Lækjamóti, 5 vetra




Eik frá Grund er einnig 5 vetra en hún er undan Markúsi frá Langholtsparti og Ösp frá Hóli. Eigendur eru Ísólfur og Þórir. Eik hlaut í aðaleinkunn 7,70


Eik frá Grund, 5 vetra