Kvennatölt Norðurlands í boði útflutningsþjónustu Eysteins Leifssonar var haldið s.l laugardag á Sauðárkróki. Skemmtilegt mót sem er eflaust komið til að vera. Leiðinda veður var þetta kvöld og þónokkuð búið að snjóa á Norðurlandi og vorið greinilega búið að fresta komu sinni í bili. En það stoppaði þær Vigdísi og Sonju ekki.

Vigdís keppti á Aþenu frá Víðidalstungu II og Freyði frá Leysingjastöðum II í flokki minna keppnisvanra en þetta var fyrsta töltkeppni þessarra ungu hrossa. Svo fór að Vigdís komst í úrslit með þau bæði, Aþenu beint í A-úrslit með 6.17 og Freyði í B-úrslit með 5.80. Hún valdi að ríða Aþenu í úrslitum og höfnuðu þær í 5.sæti með einkunnina 6.11. Flottur árangur það!

Vigdís og Freyðir frá Leysingjastöðum II

Vigdís og Aþena frá Víðidalstungu II

Vinningshafar í A-úrslitum hjá minna keppnisvönum. Fjóla, Svala, Rósa, Álfhildur og Vigdís.

Sonja keppti á hryssu úr eigin ræktun, Björk frá Lækjamóti í flokki meira keppnisvanra. En þetta var fyrsta töltkeppni Bjarkar. Þær komu aðrar inn í B-úrslit með 6.30 í einkunn, unnu sig síðan upp í A-úrslitin með 6.61 og þaðan svo upp í fjórða sætið með 6.50. Ansi mikil reið á einu kvöldi en mjög gaman. Einnig var í úrslitum í hryssan Mön frá Lækjamóti undir stjórn Ásdísar Óskar og enduðu þær þriðju.

Sonja á hryssunni sinni Björk frá Lækjamóti

Vinningshafar í A-úrslitum hjá meira keppnisvönum. Oddný, Heiðrún, Ásdís, Sonja og Hallfríður.

Skemmtilegt mót að baki og stútfull hestavika framundan með lokakvöldi í Meistaradeild KS og lokamóti í Húnversku liðakeppninni. Mikil spenna!

Þá er þriðju grein KS deildarinnar af fimm lokið og ljóst að lokakvöldið verður æsispennandi í heildarstigasöfnunni. Ísólfur keppti í fimmgangi á Krafti frá Efri Þverá og urðu þeir í 7.sæti og hefur þar með hlotið 17,5 stig og er í 2.sæti á eftir Bjarna Jónasar sem er með 24 stig.
Frumraunin í fimmgangi á Krafti gekk ágætlega og ljóst að hesturinn á mikið inni en þeir hlutu í einkunn úr forkeppni 6,50.

Á laugardaginn er svo stefnan tekin á Stjörnutölt þar sem Kraftur mætir á ísinn - svellkaldur :) .
Auk þess verður farið með Freyði frá Leysingjastöðum II í stóðhestakeppnina en Freyðir er á 5.vetur og hefur ekki komið fram áður. Það verður því spennandi að sjá hvernig hann bregst við ísnum.

Undirrituð var aldrei þessu vant ekki með myndavélina á lofti og því fylgir hér með mynd sem tekin var í vetur af Krafti en sjá má myndir og frétt frá keppnninni m.a á heimasíðunni www.feykir.is

Hestamannafélagið Þytur hefur nú fyllt árin 60 og var haldið upp á það með skemmtilegri sýningu í nýju reiðhöllinni á Hvammstanga.  Atriði sýningarinnar voru sett saman af heimafólki og má geta þess að 84 knapar tóku þátt í sýningunni og margir komu fram oftar en einu sinni þannig að hrossafjöldinn var þónokkur. Ekki amalegt fyrir ekki stærra félag. Mjög leiðinlegt hríðarveður var á föstudagskvöldið þegar generalprufan var haldin og gleymist það kvöld líklega seint á meðal aðstandenda sýningarinnar. Veðrið var ekki spennandi uppúr hádegi á laugardag en svo snarhætti veturkonungur við að gera okkur lífið leitt og fínasta veður var restina af deginum. Fullt var á sýningunni sem var afar ánægjulegt. Boðið var uppá veglegt afmæliskaffi í hléinu og hjálpuðust félagar að við það eins og annað. Um kvöldið var svo grillveisla í boði hestamannafélagsins. Nýja reiðhöllin okkar fékk nafnið Þytsheimar. Heiðursfélagi var útnefndur Guðmundur Sigurðsson, eða Gúndi eins og við þekkjum hann. Hann hefur unnið óeigingjarnt starf í þágu félagsins til fjölda ára.

Gaman er að geta þess að samheldnir Þytsfélagar lögðust á eitt við að byggja stúkur, veitinga- og salernisaðsöðu ásamt því sem félgar lögðu mikla vinnu á sig við byggingu reiðhallarinnar og einnig við að láta þessa skemmtilegu sýningu verða að veruleika.

Lækjamót var með ræktunarbússýningu og heppnaðist hún vel. Við fengum mörg hrós fyrir sýninguna og þótti okkur gaman að heyra það. Hrossin voru góð og reyndum við að flétta inní atriðið fimi og fagmennsku. Hrossin sem við vorum með voru Vígtýr f. 2004 undan Stíganda frá Leysingjastöðum og Valdísi frá Blesastöðum, Jafet f. 2003 undan Hrym frá Hofi og Sjöfn frá Miðsitju, Björk f. 2003 undan Stíganda frá Leysingjastöðum og Rauðhettu frá Lækjamóti, Mön f. 2000 undan Óði frá Brún og Von frá Stekkjarholti og Kvaran f. 2005 undan Sveini-Hervari frá Þúfu og Rauðhettu frá Lækjamóti.

 Mön og Elvar - Takk fyrir hjálpina Elvar                                           Jafet og James

Kvaran og Friðrik                                              Björk og Sonja                                      Vígtýr og Þórir í "aktion"

Lækjamótsfólkið var með í fleiri atriðum eins og t.d ræktunarbúi frá Víðidalstungu II en hross frá þeim hafa verið þónokkuð í tamningu á Lækjamóti síðustu ár. Einnig voru systkinin Ísólfur og Sonja með í atriði sem var kallað Íslandsmeistarar en Hestamannafélagið Þytur hefur í gegnum árin eignast nokkra íslandsmeistara og þótti við hæfi að þeir kæmu fram saman á þessarri sýningu.

Aþena frá Víðidalstungu II og Þórir                                                     Ræll frá Gauksmýri og Ísólfur

Ísólfur var með gæðingafimisýningu á Jaðri frá Litlu-Brekku og vakti hún lukku. Hesturinn mjúkur og flottur og sýndu þeir hinar ýmsu æfingar.

Sniðgangur á tölti                                             afturfótasnúningur                                                       skeið

Skilyrði til myndatöku voru ekki sérlega góð en við látum þó hér að lokum fljóta með nokkrar myndir frá sýningunni.
 

Stórskemmtilegir fimleikar á hestum

Svörtu folarnir                                                    Gamli tíminn                                             Dívurnar

Takk fyrir skemmtilegan dag kæru Þytsfélagar.

Reiðhallarsýning í tilefni 60 ára afmælis Hestamannafélgasins Þyts í Vestur-Húnavatnssýslu og um leið, vígsla á nýju reiðhöllinni, verður haldin laugardaginn 27.febrúar kl. 15. Sýningin verður byggð upp af heimafólki sem hefur lagt metnað sinn í fjölda skemmtilegra atriða. Fjölmörg ræktunarbú úr héraðinu, sýningar barna og unglinga, mynsturreiðar og fleira skemmtilegt. Afmæliskaffi í hléi. Aðgangseyrir er 2000 kr fyrir fullorðna, 800 kr fyrir 7-12 ára og frítt fyrir börn 6 ára og yngri.

Vonumst til að sjá sem flesta.

Það er óhætt að segja að A-úrslitin á Bautatöltinu sem fram fór á Akureyri í gær hafi verið spennandi enda frábærir hestar og knapar þar í úrslitum.
Ísólfur og Kraftur frá Efri - Þverá voru síðustu keppendur forkeppninar en alls tóku um 70 keppendur þátt.  Áður en Ísólfur kom inn á voru Þorsteinn Björnsson (Steini) og Ögri frá Hólum efstir með einkunnina 7,0 en Ísólfur og Kraftur mættu einbeittir á svellið og skutust í efsta sætið með einkunnina 7,17.  Frábær árangur hjá Krafti í sinni fyrstu töltkeppni.
Að loknu hléi og B-úrslitum hófust A-úrslitin og voru þar auk Ísólfs og Steina þeir  
Sölvi Sigurðarson og Glaður frá Grund, Barbara Wensl og Dalur frá Háleggsstöðum og  Magnús Magnússon og Farsæll frá Ibishóli sem kom upp úr B-úrslitum.

Úrslitin voru mjög jöfn en svo fór að Steini og Ögri sigruðu og Ísólfur og Kraftur urðu í 2.sæti. Í þriðja sæti var svo Barbara og Dalur, 4. varð Sölvi og Glaður og 5. urðu Maggi og Farsæll.

Að lokinni keppni var svo gæðingunum pakkað inn í ábreiður og settir upp á sömu kerru og haldið af stað heim á Hóla í snjókomunni.


Ekki gekk nægjanleg vel að ná myndum og lagði undirrituð ekki í að renna sér inn á svellið en hér koma myndir sem teknar voru þegar beðið var niðurstöðu dómara :)


Reiðkennarnir þrír - Ísólfur, Steini og Sölvi bíða spennir eftir niðurstöðu dómara



úrslitin ljós

Þá er fjórgangskeppni KS deildarinnar lokið og er óhætt að segja að hún hafi verið mjög skemmtileg. Margir góðir hestir og flottar sýningar. Úrslitin urðu þessi:



A-úrslit
1. sæti: Mette Mannseth og Happadís frá Stangarholti eink. 7,40 / 7,87
2. sæti: Ólafur Magnúss. og Gáski frá Sveinsstöðum eink. 7,30 / 7,63
3. sæti: Bjarni Jónass. og Komma frá Garði eink 7,37 / 7,63
4. sæti: Elvar E. og Mön frá Lækjamóti eink. 6,90 / 7,37

5. sæti: Ísólfur Líndal og Sindri frá Leysingjastöðum II eink. 7,03 / 7,17
6. sæti: Þórarinn E. og Fylkir frá Þingeyrum eink.7,03 / 7,13

B-úrslit
upp úr B. úrslitum og í A-úrslit fór svo Elvar E. á Mön frá Lækjamóti með 7,33
7. sæti: Sölvi S. og Nanna frá Halldórsstöðum eink. 6,77 / 7,23
8. sæti: Magnús Bragi og Farsæll frá Íbishóli eink. 6,87 / 7,20
9. sæti:  Líney María og Þytur frá Húsavík eink. 6,73 / 6,80



Ísólfur og Sindri frá Leysingjastöðum II


Sölvi og Nanna frá Halldórsstöðum


Ólafur Magnússon og Gáski frá Sveinsstöðum


Bjarni Jónasson og Komma frá Garði

Það var einnig nóg um að vera baksviðs en gerður verður þáttur um KS deildina líkt og áður. Auk þess fór fram fyrsti hluti rannsóknar  sem er hluti af lokaverkefni Sigríðar Bjarnadóttur BS-nema í hestafræði við Háskólann á Hólum. Verkefnið felst í að gera stöðumat  á keppnishestum  og er meðal annars mæld hjartsláttartíðni, öndunartíðni, líkamshiti og styrkur mjólkursýru í blóði. Friðrik Már er einn af leiðbeinendum þessa lokaverkefnis.