Lækjamót var með ræktunarbússýningu á Fjórðungsmótinu á Kaldármelum. Þótti fjölskyldumeðlimum þetta hin besta skemmtun enda alltaf gaman þegar vel gengur. Knapar í sýningunni voru þeir sem að hrossaræktinni á Lækjamóti standa ásamt vinafólki. Tólf hrossum var riðið í sýningunni sem öll eiga það sameiginlegt að hafa náð góðum árangri á keppnis eða kynbótabrautinni. Sérstaka athygli þeirra sem til okkar þekkja vakti þátttaka Elínar í sýningunni. Öllu venjulegu fer hún lítið á bak en hún reið galvösk í fararbroddi ásamt Þóri. Dómnefnd og fagnaðarlæti áhorfenda dæmdu bestu sýninguna og svo fór að Lækjamót stóð uppi sem sigurvegari af þeim 11 búum sem tóku þátt. Við viljum þakka stuðninginn.

Hjónin Elín og Þórir ríða Björk og Návist

Jóhann og Sigurrós nær, Guðmar og Alúð fjær                                   Guðmundur og Eyvör

Feðginin Ásdís og Elvar á Röst og Hlekk                                             Friðrik á Ólafíu

Vigdís á Sögn, Elín á Björk                                                           James og Jafet

Systkinin Sonja og Ísólfur tóku á móti viðurkenningu fyrir hönd bússins

HÉR má sjá viðtal við Ísólf að lokinni ræktunarbússýningunni, fengið af fréttavef Eiðfaxa.

Einn verðlaunagripanna

Af þeim 11 verðlaunagripum sem komu heim á Lækjamót að loknu Fjórðungsmóti unnust  6 þeirra á hringvellinum. Verðlaunagripir mótsins voru sérstaklega fallegir og ekki amalegt stofustáss.

Freyðir frá Leysingjastöðum II

Freyðir frá Leysingjastöðum II og Ísólfur náðu þeim frábæra árangri að sigra B-flokkinn með hvorki meira né minna en 9.01 í einkunn í úrslitum! Þar að auki var Freyðir valinn hestur mótsins. Þessi skrefstóri geðprýðis gæðingur hefur verið í þjálfun hjá Ísólfi og Vigdísi frá fjögurra vetra aldri og er alltaf að bæta sig. Eigandi Freyðis er Jane George.

Kristófer frá Hjaltastaðahvammi

Ísólfur kom fleiri hestum í úrslit í B-flokki. Kristófer frá Hjaltastaðahvammi var einnig í A-úrslitum knapi á honum þar var James. Kristófer hlaut 8.51 í úrslitunum og 7.sæti. Eigandi Kristófers er Ísólfur og Knút Lützen.

Vaðall frá Akranesi

Hinn knái 6 vetra gæðingur Vaðall frá Akranesi fór í sín fyrstu úrslit en hann var í B-úrslitum í B-flokki. Þar stóð hann sig með stakri prýði í slagveðrinu sem gekk þá yfir og völlurinn eftir því. Hann hlaut í úrslitunum 8.55 í einkunn og 12 sæti. Kommunni neðar en næsti. Eigandi Vaðals er Richard George. Knapi var Ísólfur.

Álfrún frá Víðidalstungu II

Álfrún frá Víðidalstungu II er Álfasteinsdóttir í eigu Ingvars Jóhannssonar. Hún var í B-úrslitum í A-flokki og varð kommunni frá því að komast upp í A-úrslit. Endaði því í 9. sæti með 8.53 í einkunn. Knapi á þessarri prýðisgóðu fyrstu verðlauna hryssu var Ísólfur.

Björk frá Lækjamóti

Á Fjórðungsmóti er einnig keppt í tölti þar tóku þátt fjögur hross frá Lækjamóti þau Björk, Sögn, Hlekkur og Jafet með knöpum sínum Ísólfi, Vigdísi, Elvari og James. Ísólfur og Björk hlutu 6.93 í forkeppni og með þá einkunn komst þau í B-úrslit.  Í úrslitunum hlutu þau 6.83 og 9 sæti.

Það er óhætt að vera ánægður með árangurinn á Fjórðungsmótinu. Hér má sjá viðtal af fréttavef hestafrétta við Ísólf að loknum sigrinum í B-flokki á Freyði.

Vel heppnuðu Fjórðungsmóti á Kaldármelum er lokið. Mótið kom sérstaklega vel út fyrir Lækjamót sem okkur þykir að sjálfsögðu mjög gaman og erum stolt af. Í þessarri frétt verður í stórum dráttum rakinn árangur kynbótahryssnanna sem fóru á mót frá okkur. Fjórar hryssur úr okkar ræktun voru í einstaklingsdóm, þær Alúð, Gáta, Ólafía og Sigurrós. Skemmst er frá því að segja að þær komust allar í verðlaunasæti í sínum aldursflokkum þrátt fyrir að engin þeirra hafi farið í sinn hæsta dóm.

Ólafía frá Lækjamóti

Ólafía er 5 vetra undan Aðli frá Nýja-Bæ og Kolfinnsdótturinni Rauðhettu frá Lækjamóti. Hún hlaut 9 fyrir tölt, brokk og vilja&geðslag og sannaði þar með að gæði hennar eru ótvíræð. Mýkt, skreflengd, fótaburður og rými. Ásækin og þjál. Aðaleinkunn hennar á mótinu var 8.13 og hún varð í 5. sæti í flokki 5 vetra hryssna. 

Sigurrós frá Lækjamóti

Sigurrós er 6 vetra systir Ólafíu að móðurinni til, undan Trú frá Auðsholtshjáleigu. Hún er jöfn og skrefstór alhliðahryssa sem bætti bara í eftir því sem leið á mótið. Í aðaleinkunn hlaut hún 8.04 og 3.sæti í flokki 6 vetra hryssna.

Gáta frá Lækjamóti

Gáta er 6 vetra jöfn og góð alhliðahryssa einnig undan Trú frá Auðsholtshjáleigu og móðir hennar er Toppa frá Lækjamóti. Gáta hlaut 8.5 fyrir bæði skeið og vilja&geðslag. Skeiðupplagið er stórgott, taktgott skeið og ferðmikið. Í aðaleinkunn á mótinu hlaut hún 8.13 og stóð efst í flokki 6 vetra hryssna.

Alúð frá Lækjamóti

Alúð er 7 vetra undan Þorsta frá Garði og Von frá Stekkjarholti. Alúð er hágeng, takthrein og skrefstór ahliðahryssa en hún náði sér ekki alveg á strik á mótinu. Alúð hlaut 7.95 í aðaleinkunn og 5. sæti í flokki 7 vetra og eldri hryssna og var nokkuð frá sínu besta.

Þessar hryssur eru allar á leið í ræktun á Lækjamóti. En þær eru meðal þeirra 8 fyrstu verðlauna hryssna sem eru að fara nýjar í ræktun á Lækjamóti í sumar.